مدربة إتكيت شامية

موضوع: مدربة إتكيت شامية نوفمبر 7th 2009, 1:44 pm

آنستي العزيزة

لو ربنا فك عقدتك وانخطبتي.. فإليك نصائحي حتى تأخذي بخطيبك من مركب الخطوبة إلِى ماحدا بيعرف راح ترسى على شو إلى مثوااااه الأخير في قفص النسانيس ( القرود ) قصدي قفص الزوجية السعيد...

أجمل ما في الخطوبة العزايم الرومانسية على أحلى محلات أكل في البلد واللي عمرك ماراح تشوفيها بعد الزواج.. المهم نصائحي لك عند أي عزيمة مع خطيبك.. قلنا رقَّه ....

1. الأول لازم تعرفي إن الشوكة والسكينة بينمسكوا من إيديهم من الطرف يعني مو من الوسط ولا من البوز متل الخنجر ولا من فوق طبعًااا

2. الخبز ... أوعي تفضحينا وتقطعيه بسنانك ولا الرغيف نصين بأيدك وكل نص لقمة وعلى دحش

( بالغصب ) أوعي.. الخبز بيتقطع بالسكينة بالصحن.. وبعدين بتاخدي لقمة.. لقمة.. بالزور ( بصعوبة ) قال يعني نفسك مسدودة.. اضغطي على أعصابك جدااا وبعدين لما تروَّحي.. إبقي حِشّي (كلي بوحشية )متل ما بدك....

3. الشوووربة أبوس كعب رجلك ... بند الشوربة مهم جدًاااا.. الشوربة بتنشرب من غير صوت أبداً.. ومن غير ماتقعدي تنفخي فيها.. متل صبي النارة تبع الأركيلة اللي بينفخ في الفحم للزبون.. وطبعًاااااا بدي ياكي تنسى تمامًا الطاسة اللي بتحطيها على تمك في البيت وتشرشري على حالك..
بالمعلقه وبدون صوت.. سخنة .. نار .. كمان بدون صوت.. وبتتركي تلت (1/3) الطبق ع الأقل.. مو تميليه.. منشان تلهطيها (تبلعيه) لآخر نقطة......

4. الرز طبعاً بيتاكل بالشوكة أوعي (إياكي) إيدك تنمد ع المعلقة.. وتغرفي من طبق الرز وتعبي.. إوعي... الرز بالشوكة... وكأنك بتبوسيه .. مو بتاكليه...

5. المعكرونة.. الاسباكتي كمان بالشوكة.. بتنلف على طرف الشوكة.. لحد ما تخلص وبعدين تحطيها ف تمك(بفمك( عالسكت (بدون صوت).. مو تشفطي (تسحبيها) المعكرونة عود عود..

6. السمك مشكلة.. شوفي.. بتفصلي اللحم عن الشوك. شلوووون..؟؟ تقطعي اللحم من النص.. بالطول وبعدين تفردي اللحم ع الجانبين ولما تخلصي ناحية.. ما تقلبي السمكة.. بلا فضايح.. شيلي السلسلة بالشوكة والسكينة وحطيها جنب الصحن وكملي أكل النص التاني.. وبدال الفيلم الهندي هاد.. نصيحة.. ما تاكلي السمك أبداً.. قولي مابحب السمك ونفدي حالك..

7. الجمبري -إذا كنتي بتعرفيه-.. أول ماطبق الجمبري بينزل.. طلعي عليه بقرف واحتقار شديدين.. قال يعني قرفانة من كتر أكل الجمبري الجامبو في بيت بابااااا... وأتنهدي بقوة وقولي.. كمااااان..؟؟؟ وبتروحي قاطعة راس الجمبريياية بالشوكة.. أنا ف عرضك (كناية عن أبوس يدك )إنسي المصمصة هلق..

8. البطاطا سواء مسلوقة أو مقلية أوعي تهرسيها وترميها ع الرز ويللا..... لا..لآ...لآ...بالشوكة قطعة قطعة وإنت متل ما تكوني راح تبكي من كتر ما البطاطا صعبانة عليكي..

9. الفاكهة.. لو الفاكهة فيها بذر طلعيه من تمك على مهل وحطيه ف إيدك وهي مسكرة وبعدين في طفاية السجاير اللي على الطاولة.. أوعي ياحبيبتي من نظام التفتفة للبذر.. إنسي....

10. ولما تخلصي أكل .. بتحطي إيدك على بطنك -اللي عصافيرها عمتزقزق من العيّنات والنماذج اللي أكلتيها-.. وتقولي له مو معقول.. أنا عمري ما انفجعت هيك.. أنا قدامي أسبوع.. ما راح آكل فيه.....

وبعدين تمسكي الفوطة اللي دايمًا موجودة ع الطاولة من غير لزوم.. وتبوسيها.. قال يعني بتمسحي تمك..

وبعدين تستأذني منه لدخول التواليت لإصلاح ماكياجك وبتدخلي التواليت وبتطالعي من الشنطة تبعيتك.. صندويشة الفلافل اللي جايبتيها معك وبالهنا والشفااااااااااااا